ಮೈಸೂರು, ಮಂಗಳೂರು ಹಾಗೂ ಹಂಪಿ ವಿ.ವಿದ್ಯಾಲಯದಲ್ಲಿ ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನ ಕೇಂದ್ರದಿಂದ ಪಿಎಚ್.ಡಿ ಪಡೆದವರು

 

ಕನಕ ಚಿಂತನ-ವಿಶೇಷ ಉಪನ್ಯಾಸ ಮಾಲಿಕೆ, ಹಿರಿಯ ನಾಗರಿಕರ ಸಂಘ (ರಿ.,) ಬ್ರಹ್ಮಾವರ (ದಿನಾಂಕ: 03.11.2026)

 

ಕನಕ ಸಾಹಿತ್ಯದಲ್ಲಿ ಮನೋವಿಕಾಸಕ್ಕೆ ಹಲವು ನೆಲೆಗಳಿವೆ. ಕನಕದಾಸರ ಏಕನೆಲೆ ಕಾಗಿನೆಲೆಯಾದರೂ, ದೇವರು, ಭಕ್ತಿ, ಕರ್ಮ ಹೀಗೆ ಹಲವು ಸ್ತರಗಳಲ್ಲಿ ಭಾವನಾತ್ಮಕವಾಗಿ, ಸಂತುಲಿತ ಹಾಗೂ ಸಮತೋಲಿತವಾಗಿ ಭಾವವಿಕಾಸದ ಜೊತೆಗೆ ಆತ್ಮವಿಕಾಸದ ಪಥವನ್ನು ತೆರೆದುತೋರಿದ್ದಕ್ಕಾಗಿ ಕನಕದಾಸರು ಮುಖ್ಯರಾಗುತ್ತಾರೆ. ಅವರು ಸಂವಹನಕ್ಕಾಗಿ ಬಳಸಿಕೊಂಡ ಮಾಧ್ಯಮ ಗೇಯಪ್ರಕಾರ. ನಳಚರಿತ್ರೆ ಮನುಷ್ಯನ ಅಹಂ ನಿರಸನದ ವಿಕಾಸದ ಚಿತ್ರಣವಾದರೆ, ಮೋಹನ ತರಂಗಿಣಿ ಆಧ್ಯಾತ್ಮಿಕ ಹಿನ್ನೆಲೆಯಲ್ಲಿ ಕೃಷ್ಣನೇ ಸರ್ವಶ್ರೇಷ್ಠ ಎಂದೆನ್ನುವ ಕಾವ್ಯ. ಕೃಷ್ಣನೇ ಸರ್ವಸ್ವ ಎಂಬುದಾಗಿ ಹರಿಭಕ್ತಿ ಸಾರ ಸಾರಿದರೆ, ರಾಮಧಾನ್ಯ ಚರಿತ್ರೆ ಮೇಲರಿಮೆ ಮತ್ತು ಕೀಳರಿಮೆಗಳ ತೊಡೆಯುವಿಕೆಯೇ ವಿಕಾಸ ಪಥದ ಹಾದಿಗೆ ಮೆಟ್ಟಿಲಾಗುವಿಕೆ ಎಂಬುದನ್ನು ತಿಳಿಯಪಡಿಸುವ ಕಾವ್ಯ ಎಂಬುದಾಗಿ ಮೂಡಬಿದಿರೆ ಆಳ್ವಾಸ್ ಕಾಲೇಜಿನ ಕನ್ನಡ ವಿಭಾಗದ ಮುಖ್ಯಸ್ಥರಾದ ಡಾ.ಯೋಗೀಶ್ ಕೈರೋಡಿ ಹೇಳಿದರು. ಅವರು ದಿನಾಂಕ:೩.೧೧.೨೦೨೬, ಮಂಗಳವಾರದಂದು, ಉಡುಪಿಯ ಕನಕದಾಸ ಅಧ್ಯಯನ ಸಂಶೋಧನ ಪೀಠ, ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜ್ಯುಕೇಶನ್  ಹಾಗೂ ಹಿರಿಯ ನಾಗರಿಕರ ಸಂಘ (ರಿ.) ಬ್ರಹ್ಮಾವರ ಇವರ ಸಹಯೋಗದಲ್ಲಿ ಬ್ರಹ್ಮಾವರದಲ್ಲಿ ನಡೆದ ಕನಕ ಚಿಂತನ-ವಿಶೇಷ ಉಪನ್ಯಾಸ ಮಾಲಿಕೆಯಲ್ಲಿ  ಕನಕ ಸಾಹಿತ್ಯದಲ್ಲಿ ಮನೋವಿಕಾಸದ ನೆಲೆಗಳು ಎಂಬ ವಿಷಯದ ಕುರಿತು ಉಪನ್ಯಾಸ ನೀಡಿ ಮಾತನಾಡುತ್ತಿದ್ದರು.

ಅಜ್ಞಾನ, ತಾರತಮ್ಯ ಬದಿಗೆ ಸರಿಸಿ, ಕೃಷ್ಣನೇ ಸರ್ವಶ್ರೇಷ್ಟ ಎಂಬುದಾಗಿ ಸಾರಿ ಬದುಕನ್ನು  ಸಂಪೂರ್ಣವಾಗಿ ಚಿಂತನೆಗೆ ಒಳಪಡಿಸಿದ ಕನಕದಾಸರು ಸಾರ್ವಕಾಲಿಕ ಶ್ರೇಷ್ಠ ಸಂತ ಎಂಬುದಾಗಿ ಅವರು ಹೇಳಿದರು. ಸಭೆಯ ಅಧ್ಯಕ್ಷತೆಯನ್ನು ವಹಿಸಿದ ಹಿರಿಯ ನಾಗರಿಕರ ಸಂಘ (ರಿ.) ಬ್ರಹ್ಮಾವರ ಇದರ ಅಧ್ಯಕ್ಷರಾದ ಪ್ರೊ. ಜಿ. ಬಾಲಕೃಷ್ಣ ಶೆಟ್ಟಿ ಮಾತನಾಡಿ, ಕನಕದಾಸರ ಪ್ರತಿಯೊಂದು ಚಿಂತನೆಗಳು ಇಂದಿಗೂ ಪ್ರಸ್ತುತ, ಅನುಸರಿಸಿ, ಅನುಭವಿಸಿದರೆ ಬದುಕು ಬಂಗಾರವಾಗುವುದರಲ್ಲಿ ಸಂಶಯವಿಲ್ಲವೆಂದರು. ಶ್ರೀ ವಸಂತ ಶೆಟ್ಟಿ ಕನಕ ಕೀರ್ತನೆ ಹಾಡಿದರು. ಕನಕದಾಸ ಅಧ್ಯಯನ ಸಂಶೋಧನ ಪೀಠದ ಸಲಹಾ ಸಮಿತಿ ಸದಸ್ಯರಾದ ಡಾ. ಅರುಣ್ ಕುಮಾರ್ ಎಸ್.ಆರ್. ಉಪಸ್ಥಿತರಿದ್ದರು.

ಕನಕದಾಸ ಅಧ್ಯಯನ ಸಂಶೋಧನ ಪೀಠದ ಆಡಳಿತಾಧಿಕಾರಿ ಡಾ.ಬಿ. ಜಗದೀಶ್ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಶ್ರೀ ಹರೀಂದ್ರನಾಥ ಶೆಟ್ಟಿ ಅತಿಥಿಗಳನ್ನು ಸ್ವಾಗತಿಸಿದರು. ಅಲ್ಫೊನ್ಸ್ ಡಿಸೋಜ ವಂದಿಸಿದರು.  ಹಿರಿಯ ನಾಗರಿಕರ ಸಂಘದ ಕಾರ್ಯದರ್ಶಿ ಸಂಕಯ್ಯ ಶೆಟ್ಟಿ ಕಾರ್ಯಕ್ರಮ ನಿರೂಪಿಸಿದದರು.  

2025 ರ ಸಾಲಿನ ರಾಷ್ಟ್ರಕವಿ ಗೋವಿಂದ ಪೈ ಪ್ರಶಸ್ತಿಗೆ ಹಿರಿಯ ಪುರಾತತ್ವಜ್ಞ ಡಾ. ಎಂ. ಎಸ್. ಕೃಷ್ಣಮೂರ್ತಿ ಆಯ್ಕೆ

ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ಮೂಲಕ ನೀಡುವ ಶ್ರೀಮತಿ ಟಿ. ವಿಮಲಾ ವಿ. ಪೈ  ಪ್ರಾಯೋಜಿತ ರಾಷ್ಟ್ರಕವಿ ಗೋವಿಂದ ಪೈ ಪ್ರಶಸ್ತಿಯ ಆಯ್ಕೆ ಸಮಿತಿಯು 2025ನೇ ಸಾಲಿನ ಪ್ರಶಸ್ತಿಗೆ ಡಾ. ಎಂ. ಎಸ್. ಕೃಷ್ಣಮೂರ್ತಿ ಆಯ್ಕೆಯಾಗಿದ್ದಾರೆ. ಈ ಪ್ರಶಸ್ತಿಯನ್ನು ಶ್ರೀ ಟಿ.ವಿ ಮೋಹನ್‌ದಾಸ್ ಪೈ ಅವರು ಸ್ಥಾಪಿಸಿದ್ದು, ಪ್ರಶಸ್ತಿಯು ೧.೦೦ ಲಕ್ಷ ರೂಪಾಯಿ ನಗದು ಹಾಗೂ ಪ್ರಶಸ್ತಿ ಪತ್ರವನ್ನೊಳಗೊಂಡಿರುತ್ತದೆ. ಪ್ರಶಸ್ತಿ ಪ್ರದಾನ ಕಾರ್ಯಕ್ರಮವು ಡಿಸೆಂಬರ್ ತಿಂಗಳ ಮೊದಲವಾರದಲ್ಲಿ ನಡೆಯಲಿದೆ ಎಂದು ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ಆಡಳಿತಾಧಿಕಾರಿ ಡಾ. ಬಿ. ಜಗದೀಶ್ ಶೆಟ್ಟಿ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಹಿರಿಯ ಪುರಾತತ್ವಜ್ಞ ಹಾಗೂ ಶಾಸನಶಾಸ್ತ್ರ ತಜ್ಞರೂ ಆದ ಡಾ. ಎಂ. ಎಸ್. ಕೃಷ್ಣಮೂರ್ತಿ ೧೯೪೫ರಲ್ಲಿ ಮೈಸೂರಿನಲ್ಲಿ ಜನಿಸಿದರು.  ಎಂ.ಎ., ಪಿಎಚ್.ಡಿ., ಎಪಿಗ್ರಫಿ ಡಿಪ್ಲೊಮಾ ಪದವೀಧರರು. ಐದು ದಶಕಗಳಿಗೂ ಹೆಚ್ಚು ಕಾಲ ಇತಿಹಾಸ ಮತ್ತು ಉತ್ಖನನ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿರುತ್ತಾರೆ. ಭಾರತೀಯ ದೇವಾಲಯ ವಾಸ್ತುಶಿಲ್ಪ ಮತ್ತು ಶಿಲ್ಪಕಲೆ, ಪ್ರಾಚೀನ ಹಾಗೂ ಮಧ್ಯಕಾಲೀನ ಪುರಾತತ್ವ ಉತ್ಖನನಗಳು ಮತ್ತು ಶಾಸನಗಳ ಅಧ್ಯಯನ ಇವರ ವಿಶೇಷ ಕ್ಷೇತ್ರಗಳು. ಇವರ ಮಾರ್ಗದರ್ಶನದಲ್ಲಿ ಹತ್ತು  ಸಂಶೋಧನ ವಿದ್ಯಾರ್ಥಿಗಳು ಪಿಎಚ್.ಡಿ. ಪದವಿ ಪಡೆದಿದ್ದಾರೆ. ಇವರು ಹತ್ತಕ್ಕೂ ಹೆಚ್ಚು ಪುಸ್ತಕಗಳು ಮತ್ತು ೧೩೦ಕ್ಕೂ ಹೆಚ್ಚು ಸಂಶೋಧನಾ ಪ್ರಬಂಧಗಳನ್ನು ಪ್ರಕಟಿಸಿದ್ದಾರೆ; ಮೈಸೂರು, ಧಾರವಾಡ, ಬೆಂಗಳೂರು, ತಿರುಪತಿ, ತುಮಕೂರು ಸೇರಿದಂತೆ ೯೫ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವಿಚಾರ ಸಂಕಿರಣ ಹಾಗೂ ಸಮ್ಮೇಳನಗಳಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿದ್ದಾರೆ. ಕರ್ನಾಟಕದಲ್ಲಿ ಬೌದ್ಧಕಲೆ ಮತ್ತು ಸಂಸ್ಕೃತಿ  ಅಲ್ಲದೆ ಹಲವು ಇತಿಹಾಸ ಮತ್ತು ಪುರಾತತ್ವಕ್ಕೆ ಸಂಬಂಧಿಸಿದ ಸಂಸ್ಥೆಗಳ ಅಜೀವ ಸದಸ್ಯರಾಗಿದ್ದಾರೆ.

ಮೈಸೂರು ವಿಶ್ವವಿದ್ಯಾನಿಲಯದ ಪ್ರಾಚೀನ ಇತಿಹಾಸ ಮತ್ತು ಪುರಾತತ್ವ ಅಧ್ಯಯನ ವಿಭಾಗದ ಅಧ್ಯಕ್ಷರಾಗಿ ವಿಶ್ವವಿದ್ಯಾನಿಲಯದ ಶೈಕ್ಷಣಿಕ ಮಂಡಳಿಯ ಸದಸ್ಯರಾಗಿ, ವಿವಿಧ ವಿಶ್ವವಿದ್ಯಾನಿಲಯಗಳ ಅಧ್ಯಯನ ಮಂಡಳಿ ಹಾಗೂ ನೇಮಕಾತಿ ಮಂಡಳಿಗಳ ಅಧ್ಯಕ್ಷರಾಗಿ/ಸದಸ್ಯರಾಗಿ/ವಿಷಯ ತಜ್ಞರಾಗಿ, ವಿವಿಧ ರಾಜ್ಯಗಳ ಲೋಕಸೇವಾ ಆಯೋಗಗಳ ಪರೀಕ್ಷಾ ಮಂಡಳಿಗಳ ಅಧ್ಯಕ್ಷರಾಗಿ/ ಸದಸ್ಯರಾಗಿ, ಕೇಂದ್ರ ಪುರಾತತ್ವ ಸಲಹಾ ಮಂಡಳಿಯ (CABA) ಸದಸ್ಯರಾಗಿ ಕಾರ್ಯನಿರ್ವಹಿಸಿದ್ದಾರೆ. ಬೆಂಗಳೂರಿನ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಅಡ್ವಾನ್ಸ್ಡ್ ಸ್ಟಡೀಸ್ (NIAS)ನಲ್ಲಿ ಗೌರವ ಸಂದರ್ಶಕ ಪ್ರಾಧ್ಯಾಪಕರಾಗಿದ್ದರು; ಮಿಥಿಕ್ ಸೊಸೈಟಿಯ ‘ಭಾರತದ ಇತಿಹಾಸ ಮತ್ತು ಸಂಸ್ಕೃತಿ’ ಸರಣಿಯ ಸಲಹಾ ಮಂಡಳಿಯ ಸದಸ್ಯರಾಗಿ ಮತ್ತು ಮೈಸೂರು ವಿಶ್ವವಿದ್ಯಾನಿಲಯದ ಶ್ರವ್ಯ–ದೃಶ್ಯ ಸಂಶೋಧನಾ ಕೇಂದ್ರದಲ್ಲಿ ವಿಷಯ ತಜ್ಞರಾಗಿಯೂ ಸೇವೆ ಸಲ್ಲಿಸಿದ್ದಾರೆ.

ಇವರ ಪ್ರಮುಖ ಕೃತಿಗಳಲ್ಲಿ ‘ನೊಳಂಬರು’  ‘ತಲಕಾಡಿನ ಪುರಾತತ್ವ ಉತ್ಖನನಗಳು’ ‘ಅಣ್ಣಿಗೇರಿಯ ಪುರಾತತ್ವ ಉತ್ಖನನ – ವರದಿ’, ಇತ್ಯಾದಿ ಅವರ ಪ್ರಮುಖ ಕೃತಿಗಳು, ಭಾರತೀಯ ನಾಣ್ಯಶಾಸ್ತ್ರ ಸೊಸೈಟಿಯ (ವಾರಣಾಸಿ) ಪತ್ರಿಕೆಯ ಸಂಪಾದಕರಾಗಿ ಸಂಪುಟ LIV (೧೯೯೨)ರಿಂದ LXII ಮತ್ತು LXIII (೨೦೦೦, ೨೦೦೧)ರವರೆಗೆ, ಹಾಗೂ ಮೈಸೂರು ವಿಶ್ವವಿದ್ಯಾನಿಲಯದ ವಿಭಾಗದ ‘ಜರ್ನಲ್ ಆಫ್ ಆರ್ಕಿಯಲಾಜಿಕಲ್ ಸ್ಟಡೀಸ್’ ಪತ್ರಿಕೆಯ ಸಂಪಾದಕರಾಗಿಯೂ ಕಾರ್ಯವನ್ನು ನಿರ್ವಹಿಸಿದ್ದಾರೆ. ಇವರಿಗೆ ೨೦೦೯–೨೦೧೧ರ ಅವಧಿಗೆ ಯು.ಜಿ.ಸಿ. ಎಮೆರಿಟಸ್ ಫೆಲೋಶಿಪ್ ಲಭಿಸಿದೆ. ಕರ್ನಾಟಕ ಇತಿಹಾಸ ಅಕಾಡೆಮಿಯ ೨೪ನೇ ವಾರ್ಷಿಕ ಸಮ್ಮೇಳನದ (ಆದಿಚುಂಚನಗಿರಿ, ನಾಗಮಂಗಲ ತಾಲ್ಲೂಕು, ಮಂಡ್ಯ ಜಿಲ್ಲೆ; ೧೩–೧೫ ನವೆಂಬರ್ ೨೦೧೦) ಸರ್ವಾಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ನೊಳಂಬ ಇತಿಹಾಸ ಪ್ರಶಸ್ತಿ ಮತ್ತು ‘ನೊಳಂಬ ಶ್ರೀ’ ಬಿರುದು, ಸೋದೆ ಸದಾಶಿವರಾಯ ಪ್ರಶಸ್ತಿ ಹಾಗೂ ಚಿದಾನಂದ ಪ್ರಶಸ್ತಿ (೨೦೨೦) ಇವರಿಗೆ ಸಂದಿವೆ. ಆಯ್ಕೆ ಸಮಿತಿಯ ಸದಸ್ಯರಾದ ಡಾ. ತಾಳ್ತಜೆ ವಸಂತ ಕುಮಾರ್, ಡಾ. ಕೆ. ಚಿನ್ನಪ್ಪ ಗೌಡ, ಡಾ. ಪ್ರಭಾಕರ ಜೋಶಿ, ಡಾ. ಕಿಶೋರಿ ನಾಯಕ್, ಡಾ. ಎಸ್.ವಿ ಪಾಡೀಗಾರ್ ಸಹಕರಿಸಿದ್ದಾರೆ.

ಕನಕ ಚಿಂತನ ಉಪನ್ಯಾಸ ದಿನಾಂಕ: 3.11.2026, ಹಿರಿಯ ನಾಗರಿಕರ ಸಂಘ , ಬ್ರಹ್ಮಾವರ (ರಿ.)

 

ಕನಕ ಚಿಂತನ-ವಿಶೇಷ ಉಪನ್ಯಾಸ ಮಾಲಿಕೆ ,ಎಸ್.ಎಂ.ಎಸ್. ಕಾಲೇಜು, ಬ್ರಹ್ಮಾವರ, ದಿನಾಂಕ: 23.10.2026

 

ವ್ಯಕ್ತಿಯ ಮಾನಸಿಕ ಹಾಗೂ ದೈಹಿಕ ಸ್ವಾಸ್ಥ÷್ಯವನ್ನು ಕಾಪಾಡುವುದರ ಮೂಲಕ ಸಮಾಜದ ಸ್ವಾಸ್ಥ್ಯವನ್ನು ಕಂಡುಕೊಳ್ಳಬಹುದು. ಮಾತು ಸ್ಪಷ್ಟವಾಗಿದ್ದರೆ ಅದು ಅವರ ಆರೋಗ್ಯವನ್ನು ಪ್ರತಿಫಲಿಸುತ್ತದೆ. ಸಾಮಾನ್ಯವಾಗಿ ವಿಜಯನಗರ ಅರಸರ ಆಡಳಿತದ ಕಾಲವನ್ನು ಸುವರ್ಣಯುಗ ಎಂದು ಕರೆಯುತ್ತಿದ್ದರು. ಅಂದರೆ ಆ ಕಾಲದ ಸಾಮಾಜಿಕ ವ್ಯವಸ್ಥೆ ಹಾಗೂ  ಸಂಬಂಧಗಳು ಮಾನವೀಯ ಮುಖವನ್ನು ಹೊಂದಿದ್ದುವು ಎಂದು ಅರ್ಥ. ದೇಹವೆಂಬುದು ಆತ್ಮದ ವಾಹನ. ದೇಹ ಶಾಶ್ವತವಲ್ಲ. ಕುಲ, ಭಾಷೆ, ಆಚಾರವಿಚಾರಗಳು ನಮ್ಮನ್ನು ಬೆಂಬಿಡದೆ ಬರುತ್ತವೆ. ಅವನ್ನೆಲ್ಲಾ ನಿವಾರಿಸಿಕೊಂಡು ಮುನ್ನಡೆದು ಆತ್ಮಸಾಕ್ಷಾತ್ಕಾರ ಮಾಡಿಕೊಳ್ಳುವ ಪರಿಯನ್ನು ಕನಕದಾಸರು ತಮ್ಮ ಕೀರ್ತನೆಗಳಲ್ಲಿ ಭಿನ್ನವಿಸಿಕೊಂಡರು. ಅವರ ‘ಕುಲಕುಲವೆನ್ನುತಿಹರು’  ಎಂಬ ಕೀರ್ತನೆಯಲ್ಲಿ  ಇತರರ ಹಿತವನ್ನು ಬಯಸುವವನೇ ನಿಜವಾದ ಮನುಷ್ಯ ಎಂಬುದಾಗಿ ಪ್ರತಿಪಾದಿಸುತ್ತಾರೆ. ಮಾತು ನಿರ್ಮಲವಾಗಿರಬೇಕು ಇಲ್ಲವಾದರೆ ಅದೊಂದು ಕಡ್ಡಿ ತಿನಿಸು ಎಂಬ ಅವರ ಚಿಂತನೆಗಳು ಸಾರ್ವಕಾಲಿಕ ಯೋಗ್ಯ ಎಂಬುದಾಗಿ ಮೂಡಬಿದಿರೆ ಆಳ್ವಾಸ್ ಕಾಲೇಜಿನ ಕನ್ನಡ ವಿಭಾಗದ ಪ್ರಾಧ್ಯಾಪಕರಾದ ಪ್ರೊ. ಹರೀಶ್ ಟಿ.ಜಿ ಹೇಳಿದರು. ಅವರು ದಿನಾಂಕ: ೨೩.೧೦.೨೦೨೬, ಬುಧವಾರದಂದು, ಎಸ್.ಎಂ.ಎಸ್.ಕಾಲೇಜಿನ ಸಭಾಂಗಣದಲ್ಲಿ,  ಕನಕದಾಸ ಅಧ್ಯಯನ ಸಂಶೋಧನ ಪೀಠ, ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜ್ಯುಕೇಶನ್  ಹಾಗೂ ಎಸ್.ಎಂ.ಎಸ್. ಕಾಲೇಜು, ಬ್ರಹ್ಮಾವರ ಇವರ ಸಹಯೋದಲ್ಲಿ ನಡೆದ ಕನಕ ಚಿಂತನ-ವಿಶೇಷ ಉಪನ್ಯಾಸ ಮಾಲಿಕೆಯಲ್ಲಿ ಕನಕ ಸಾಹಿತ್ಯದಲ್ಲಿ ಸಾಮಾಜಿಕ ಸ್ವಾಸ್ಥ್ಯ  ಚಿಂತನೆ ಎಂಬ ವಿಷಯದ ಕುರಿತು ಉಪನ್ಯಾಸ ನೀಡಿ ಮಾತನಾಡುತ್ತಿದ್ದರು. 

ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಿದ ಎಸ್.ಎಂ.ಎಸ್. ಕಾಲೇಜಿನ ಪ್ರಾಂಶುಪಾಲರಾದ ಡಾ. ರಾಬರ್ಟ್ ರಾಡ್ರಿಗಸ್ ಮಾತನಾಡಿ ಸಮಾಜದ ಸ್ವಾಸ್ಥ್ಯವಿರುವುದು ಸಹಬಾಳ್ವೆ, ಸಹಕಾರ ಹಾಗೂ ಪರಸ್ಪರ ಅರ್ಥಮಾಡಿಕೊಳ್ಳುವಿಕೆಯಲ್ಲಿ ಇರುತ್ತದೆ. ಹಿರಿಯರನ್ನು  ಅನುಸರಿಸುವ  ಜಾಯಮಾನವಿದ್ದರೆ ಸಮಾಜ ಎಂದೂ ವಿಘಟಿತಗೊಳ್ಳದು. ನಮ್ಮ ಆಲೋಚನೆಗಳು ಹಣ ಮತ್ತು ಅಧಿಕಾರಕ್ಕೆ ಸೀಮಿತವಾಗಬಾರದು. ಸಂಪತ್ತಿನ ಕ್ರೋಢೀಕರಣ ಮುಖ್ಯವಲ್ಲ ಅದರ ಸದ್ಭಳಕೆ ಬಹುಮುಖ್ಯ. ಕನಕದಾಸರು ಈ ಬಗೆಯ ಸಾಮಾಜಿಕ  ಸ್ವಾಸ್ಥ್ಯದ   ಕನಸು ಕಂಡವರು ಎಂಬುದಾಗಿ ಹೇಳಿದರು.

ಕನಕದಾಸ ಅಧ್ಯಯನ ಸಂಶೋಧನ ಪೀಠದ ಆಡಳಿತಾಧಿಕಾರಿ ಡಾ.ಬಿ. ಜಗದೀಶ್ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿ  ಅತಿಥಿಗಳನ್ನು ಸ್ವಾಗತಿಸಿದರು. ಕನಕದಾಸ ಅಧ್ಯಯನ ಸಂಶೋಧನ ಪೀಠದ ಸಲಹಾ ಸಮಿತಿ ಸದಸ್ಯರಾದ ಡಾ. ಅರುಣ್ ಕುಮಾರ್ ಎಸ್.ಆರ್. ಉಪಸ್ಥಿತರಿದ್ದರು. ಕಾಲೇಜಿನ ಇತಿಹಾಸ ಉಪನ್ಯಾಸಕ ಪ್ರಶಾಂತ್ ಶೆಟ್ಟಿ ವಂದಿಸಿದರು. ವಿದ್ಯಾರ್ಥಿಗಳಾದ ಅಮೃತಾ ಹಾಗೂ ನಮೃತಾ ಕನಕಗಾಯನ ಹಾಡಿದರು.  ಬಿ.ಎ ಪದವಿ ವಿದ್ಯಾರ್ಥಿ ಆದರ್ಶ  ಕಾರ್ಯಕ್ರಮ ನಿರೂಪಿಸಿದರು.

ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನ ಕೇಂದ್ರದ ಗ್ರಂಥಾಲಯದಲ್ಲಿ ಶಾರದಾಪೂಜೆ (ದಿನಾಂಕ: 17.10.2026)

ಕ ನಕ ಚಿಂತನ ವಿಶೇಷ ಉಪನ್ಯಾಸ ಕರೆಯೋಲೆ (ಸ್ಥಳ: ಎಸ್.ಎಂ.ಎಸ್. ಕಾಲೇಜು ಬ್ರಹ್ಮಾವರ, ದಿನಾಂಕ: 23.10.2026 )